Advertisement

श्री उपसर्ग हर स्तोत्र | Shree Upsarg har stotra

उवसग्गहरं पासं, पासं वंदामि कम्मघण-मुक्कं |

विसहर-विस-णिण्णासं, मंगल-कल्लाण-आवासं ||१||

 

विसहर-फुलिंगमंतं, कंठे धारेदि जो सया मणुवो |

तस्स गह-रोग-मारी, दुट्ठ-जरा जंति उवसामं ||२||

 

चिट्ठदु दूरे मंतो, तुज्झ पणामो वि बहुफलो होदी |

णर-तिरियेसु वि जीवा, पावंति ण दुक्ख-दोगच्चं ||३||

 

तुह सम्मते लद्धे, चिंतामणि-कप्पपावय-सरिसे |

पावंति अविग्घेणं, जीवा अयरामरं ठाणं ||४||

 

इह संथुदो महायस! भत्तिब्भर णिब्भरेण हिदयेण |

ता देव! दिज्ज बोहिं, भवे भवे पास जिणचंदं ||५||

 

ॐ अमरतरु-कामधेणु-चिंतामणि-कामकुंभभमादिया |

सिरि-पासणाह-सेवाग्गहणे सव्वे वि दासत्तं ||६||

 

उवसग्गहरं त्थोत्तं, कादूणं जेण संघकल्लाणं |

करुणायरेण विहिदं, स भद्दबाहू गुरु जयदु ||७||

 

- आचार्य भद्रबाहु

Image source:

'जैन ध्वज' by KISHAN GOLCHHA, image compressed, is licensed under CC BY-SA 4.0

Post a Comment

और नया पुराने

Advertisement

Advertisement